”ഈ നിമിഷം അവസാനിക്കാതിരുന്നെങ്കില്‍…”; അര്‍ജന്റീന ജഴ്‌സിയില്‍ മെസിയുടെ അവസാന മല്‍സരം; വികാര നിര്‍ഭരമായ വിടവാങ്ങല്‍

ബ്യൂണസ് അയേഴ്‌സ്: ആഗോള ഫുട്‌ബോളിനെ രണ്ടു പതിറ്റാണ്ടോളം കാലിലൊതുക്കി മഹാമാന്ത്രികന്‍ ലയണല്‍ മെസി അന്താരാഷ്ട്ര ഫുട്‌ബോളില്‍ നിന്ന് വിടവാങ്ങി. അര്‍ജന്റീനയുടെ നീലയും വെള്ളയും ജേഴ്‌സിയിലുള്ള തന്റെ അവസാന മത്സരത്തില്‍ ഒരു ഗോളും രണ്ട് അസിസ്റ്റുകളുമായി അവിസ്മരണീയ പ്രകടനം പുറത്തെടുത്താണ് നായകന്‍ മടങ്ങിയത്. സൗഹൃദ മത്സരത്തില്‍ ആഫ്രിക്കന്‍ ടീമായ ബെനിനെ എതിരില്ലാത്ത മൂന്ന് ഗോളുകള്‍ക്കാണ് അര്‍ജന്റീന പരാജയപ്പെടുത്തിയത്.

ബ്യൂണസ് അയേഴ്‌സിലെ എസ്റ്റാഡിയോ മോണുമെന്റല്‍ സ്റ്റേഡിയത്തില്‍ നടന്ന വൈകാരിക നിമിഷങ്ങള്‍ക്ക് സാക്ഷിയാകാന്‍ ലക്ഷക്കണക്കിന് ആരാധകരാണ് ഒഴുകിയെത്തിയത്.

മത്സരത്തിലെ നിര്‍ണായക നിമിഷങ്ങള്‍

പത്താം മിനിറ്റിലെ ആദരം: മത്സരത്തിന്റെ പത്താം മിനിറ്റില്‍ കാണികളും ബെനിന്‍ കളിക്കാരും ചേര്‍ന്ന് കളി താല്‍ക്കാലികമായി നിര്‍ത്തിവെച്ച് മെസിക്ക് ആദരമര്‍പ്പിച്ചു.

48-ാം മിനിറ്റ് (10): ഒന്നാം പകുതി ഗോള്‍രഹിതമായി അവസാനിച്ചെങ്കിലും രണ്ടാം പകുതിയുടെ തുടക്കത്തില്‍ മെസിയെടുത്ത മനോഹരമായ കോര്‍ണര്‍ കിക്ക് നിക്കോളാസ് ഒട്ടാമെന്‍ഡി ഹെഡ് ചെയ്ത് വലയിലാക്കി അര്‍ജന്റീനയെ മുന്നിലെത്തിച്ചു. (ഒട്ടാമെന്‍ഡിയുടെയും അവസാന അന്താരാഷ്ട്ര മത്സരമായിരുന്നു ഇത്).

61-ാം മിനിറ്റ് (20): മെസിയുടെ പാസില്‍ നിന്നും പകരക്കാരനായി ഇറങ്ങിയ യുവതാരം നിക്കോ പാസ് അര്‍ജന്റീനയുടെ രണ്ടാം ഗോള്‍ നേടി.

71-ാം മിനിറ്റ് (30): പെനാല്‍റ്റി ബോക്‌സിനുള്ളില്‍ അഗസ്റ്റിന്‍ ഗിയെയെ ബെനിന്‍ താരം വീഴ്ത്തിയതിന് ലഭിച്ച പെനാല്‍റ്റി കൃത്യമായി ലക്ഷ്യത്തിലെത്തിച്ച് മെസി തന്റെ വിടവാങ്ങല്‍ മത്സരം ഗോളോടെ ആഘോഷമാക്കി.

ഒരിക്കലും ഈ ജഴ്‌സി അഴിച്ചുവയ്ക്കില്ലായിരുന്നു

ബെനിനെതിരെയുള്ള മത്സരശേഷമുള്ള വിടവാങ്ങല്‍ ചടങ്ങില്‍ വൈകാരിക പ്രതികരണവുമായി ഫുട്ബാള്‍ ഇതിഹാലം ലയണല്‍ മെസ്സി. തന്റെ പിതാവ് ജോര്‍ജിയെ കുറിച്ച് സംസാരിച്ച് തുടങ്ങിയ മെസ്സി വിതുമ്പലോടെയാണ് ഓരോ കാര്യങ്ങളും പറഞ്ഞ് തീര്‍ത്തത്. ‘ഇന്ന് മനസ്സില്‍ വാക്കുകളൊതുക്കാനാവാത്ത വിധം വികാരങ്ങള്‍ ഇരമ്പുകയാണ്. ഈ നിമിഷത്തില്‍ ആദ്യം ഓര്‍മ്മവരുന്നത് എന്റെ പിതാവിനെക്കുറിച്ചാണ്,’ മെസ്സി പറഞ്ഞു. അര്‍ജന്റീനയ്ക്കായി പന്തുതട്ടുക എന്നത് തന്റെ ജീവിതത്തില്‍ എന്തുമാത്രം അര്‍ത്ഥവത്താണെന്ന് വാക്കുകളില്‍ പ്രകടിപ്പിക്കാന്‍ മെസ്സി പാടുപെട്ടു. കഴിഞ്ഞ 20 വര്‍ഷമായി അര്‍ജന്റീനയുടെ ജഴ്‌സി അണിഞ്ഞ് കളിക്കളത്തിലിറങ്ങിയ അദ്ദേഹത്തിന്, ഇനി ഈ ടീമിന്റെ ഭാഗമാകാതിരിക്കുക എന്നത് വലിയ വേദനയാണ് സമ്മാനിക്കുന്നത്. തന്റെ കൈയിലാണ് കാര്യങ്ങളെങ്കില്‍ ഒരിക്കലും ഈ ജഴ്‌സി അഴിച്ചുവെക്കില്ലായിരുന്നുവെന്ന് താരം തുറന്നുപറഞ്ഞു.

‘ഈ കുപ്പായത്തോട് നന്ദി പറയാന്‍ മാത്രമേ ഇന്ന് എനിക്കുള്ളൂ. ഇരുപത് വര്‍ഷക്കാലം, ഏറ്റവും പ്രതിസന്ധി നിറഞ്ഞ ഘട്ടങ്ങളിലും ഞാന്‍ പോരാട്ടം തുടര്‍ന്നു; മുന്നേറാന്‍ എന്റെ സര്‍വ്വസ്വവും നല്‍കി, ഇവിടെത്തന്നെ തുടരാന്‍ ആഗ്രഹിച്ചു. ഇനി അര്‍ജന്റീന ദേശീയ ടീമിനൊപ്പം ഉണ്ടാകില്ല എന്നതും ഇവിടെയെത്താന്‍ കഴിയില്ല എന്നതും എന്നെ വല്ലാതെ വേദനിപ്പിക്കും. എന്റെ ഇഷ്ടപ്രകാരമായിരുന്നെങ്കില്‍ എന്റെ ആയുസ്സ് മുഴുവന്‍ ഞാന്‍ ഈ ജേഴ്‌സിയില്‍ കളിക്കളത്തില്‍ തുടര്‍ന്നേനെ. കാരണം, അര്‍ജന്റീനയ്ക്കായി കളിക്കുക എന്നത് ഈ ലോകത്തിലെ ഏറ്റവും മനോഹരമായ കാര്യമാണ്. ഈ നിമിഷം ഇവിടെ അവസാനിക്കരുതെന്ന് ഞാന്‍ ആഗ്രഹിക്കുന്നതുകൊണ്ടാണ് ഇന്ന് ഞാന്‍ എപ്പോഴത്തേക്കാളും കൂടുതല്‍ സംസാരിക്കുന്നത്,’ അദ്ദേഹം കൂട്ടിച്ചേര്‍ത്തു.

സഹതാരങ്ങളെ സ്മരിച്ച് മെസി

അര്‍ജന്റീനയ്‌ക്കൊപ്പമുള്ള തന്റെ വിജയങ്ങളെയും 2022 ലോകകപ്പ് നേട്ടത്തിലേക്ക് തന്നെ നയിച്ച സഹതാരങ്ങളെയും മെസ്സി സ്മരിച്ചു. ദേശീയ ടീമിനായി അവര്‍ നല്‍കിയ സംഭാവനകള്‍ക്ക് നന്ദി അറിയിച്ച അദ്ദേഹം, നിലവിലുള്ള യുവനിരയ്ക്കും ഭാവിയില്‍ ടീമിലെത്തുന്നവര്‍ക്കും തന്റെ പൂര്‍ണ്ണ പിന്തുണയുണ്ടാകുമെന്ന് വ്യക്തമാക്കി. ‘നാം ലോകകപ്പും കോപ്പ അമേരിക്കയും ഫൈനലിസിമയും നേടി… ഈ നേട്ടങ്ങളിലെല്ലാം ഞാന്‍ അങ്ങേയറ്റം കൃതജ്ഞനാണ്. എന്നാല്‍ ഈ യാത്ര 2022-ലോ അവസാന ലോകകപ്പിലോ മാത്രം ഒതുങ്ങുന്നതല്ല. ലോകകപ്പ് ജേതാക്കളാകുന്നതിന് എത്രയോ വര്‍ഷങ്ങള്‍ക്ക് മുമ്പ് നിരവധി സഹതാരങ്ങള്‍ എനിക്കൊപ്പം ഈ ജേഴ്‌സിക്ക് വേണ്ടി വിയര്‍പ്പൊഴുക്കിയിട്ടുണ്ട്. അവര്‍ ഓരോരുത്തരും അര്‍ജന്റീനയ്ക്ക് വേണ്ടി എത്രമാത്രം പോരാടിയെന്നും സര്‍വ്വസ്വവും നല്‍കിയെന്നും ആരും സംശയിക്കേണ്ടതില്ല. ഞങ്ങള്‍ ഓരോ തവണ കളത്തിലിറങ്ങുമ്പോഴും ഏത് എതിരാളിയെയും നേരിടാന്‍ നമുക്ക് കഴിയുമെന്ന് എനിക്ക് ഉറപ്പായിരുന്നു. ജീവന്‍ കൊടുത്തും പൊരുതാന്‍ തയ്യാറുള്ള പോരാളികളാണ് എനിക്കൊപ്പമുണ്ടായിരുന്നതെന്ന് ഞാന്‍ എപ്പോഴും വിശ്വസിച്ചു. നിങ്ങളെ എല്ലാവരെയും ഞാന്‍ വല്ലാതെ മിസ്സ് ചെയ്യും. എന്നാല്‍ എപ്പോഴും ഞാന്‍ നിങ്ങള്‍ക്കൊപ്പമുണ്ടാകും. ഈ കുട്ടികളെയും ഇനി വരാനിരിക്കുന്നവരെയും ഞാന്‍ എപ്പോഴും പിന്തുണയ്ക്കും,’ വികാരനിര്‍ഭരനായി മെസ്സി പറഞ്ഞു.

രണ്ടു പതിറ്റാണ്ടിന്റെ സുവര്‍ണ ചരിത്രം

2005-ല്‍ അര്‍ജന്റീന ദേശീയ ടീമില്‍ അരങ്ങേറ്റം കുറിച്ച മെസി, തങ്ങളുടെ രാജ്യത്തിന് സമ്മാനിച്ചത് സുവര്‍ണ കാലഘട്ടമാണ്. 2022-ലെ ഖത്തര്‍ ലോകകപ്പ് കിരീടം, രണ്ട് കോപ്പ അമേരിക്ക കിരീടങ്ങള്‍, ഒരു ഫിനാലിസിമ എന്നിവ മെസിയുടെ നായകത്വത്തിലാണ് അര്‍ജന്റീന സ്വന്തമാക്കിയത്. അര്‍ജന്റീനയ്ക്കായി ഏറ്റവും കൂടുതല്‍ ഗോളുകള്‍ നേടിയ താരമെന്ന റെക്കോര്‍ഡും മെസിയുടെ പേരില്‍ തന്നെയാണ്.

ദേശീയ ടീമിലെ യാത്ര അവസാനിപ്പിച്ചെങ്കിലും യു.എസ് ക്ലബ്ബായ ഇന്റര്‍ മയാമിക്കായി മെസി മൈതാനങ്ങളില്‍ തുടര്‍ന്നും പന്ത് തട്ടും.

Tags: Lionel Messi, Messi Retirement, Argentina vs Benin, Messi Farewell Match, Argentina Football, Messi Goals, Regional News Malayalam, International Sports Malayalam